Xoghayaha Guud ee Qaramada Midoobey, António Guterres, ayaa bishii Maajo ee sannadkii tagay Catriona Laing u magacaabay ergayga Qarmada Midoobey u qaabilsan iyada oo baddashay ergaygii ka horeeyay ee James C Swan.
Hase yeeshee hawlgalkaas ayaa lasoo koobay iyadoo bisha soo socota ee Maajo lagu ekeeyay waqtigeeda Soomaaliya ay u joogtay Qaramada Midoobey, Sida uu shaaciyay xafiiska Qaramada Midoobay ee Soomaaliya .
Marwo Catriona Laing ayaa soo saartay farriin kooban oo sagootis ah, taasi oo ay ku sheegtay in ay kalsooni buuxda ku qabto in Soomaaliya ay guuleysan doonto, islamarkaana ay sii wadi doonto taageerada Soomaaliya.
“Waxaan kalsooni buuxda ku qabaa in Soomaaliya ay guuleysan doonto iyo in Midowga Afrika iyo Qaramada Midoobay, oo ay wehliyaan saaxiibadayada caalamiga ah ay sii wadi doonaan doorka muhiimka ee lagu taageerayo dadka Soomaaliyeed ee ku socda wadada nabadda iyo xasilloonida,” ayey tiri Ms. Laing.
Waxay intaas kusii dartay “Waan sii wadi doonaa taageerada iyo u doodista Soomaaliya meel kasta oo aan joogo.”
Habka lagu soo xulayo qofka bedeli doona ayaa socda, iyada oo la filayo in isla bisha soo socotaba la magacaabo ergayga badali doona Catriona.
Si kastaba há ahaatee soo koobidda muddo xileedka Catriona ayaa kusoo aaday xilli uu sii xumaanayo khilaafka u dhexeeya Dawladda Fedaraalka Soomaaliya iyo Dawlad Goboleedka Puntland, kaas oo salka ku haya wax ka baddalka dastuurka Soomaaliya oo ay Puntland sheegtay in aan laga tala gelin.
Catriona ayaa lasoo gaabiyay muddada howl-galkeeda Soomaaliya, mana cadda illaa hadda sababta dhabta ah ee ka dambeysa arrinkaan, maadaama aysan dhameysan muddo xileedkeedka xafiiska oo sida loo bartay laba sano ama ka badan ah.
Hase yeeshee waxaa jira aragtiyo kasoo baxaya falaqeeyaasha arrimaha siyaasadda Soomaaliya, oo farta ku fiiqaya in ay jiraan arrimo saamaynaya xiriirka Qaramada Midoobey iyo Soomaaliya uu suurta gal ah in loosoo gaabiyo hawlgalka Catriona ee Soomaaliya.
Wakiillada QM ee Soomaaliya iyo muddo xiloodka aysan dhamaysan
Si la mid ah ergay walba oo ay Qaramada Midoobey usoo magacawdo Soomaaliya, Catriona Laing waxay saamayn muuqata ku lahayd siyaasadda Soomaaliya ee laba bogleynta badan muddadaas sannadka ah.
Xafiiska Qaramada Midoobey ee sida UNSOM oo kale ah ayaa loogu tala galay dalalka ay ka jiraan dagaalada sokeeya ama qalalaasaha sida uu sheegay Cumar Yuusuf Cabdulle oo ah Cilmi-baare madax bannan horena jaamacadda Simad ugasoo noqday macalin dhiga cilmiga siyaasadda.
Xafiiskan oo la abuuray sannadkii 1995 ayaa ujeedka loo abuuray ahayd "nabadda iyo dib u heshiisiinta hogaamiyaasha Soomaalida dhexdooda ama ururrada dawliga ah iyo kuwa aan dawliga ahayn" - Cumar.
Haddaba xafiiskan waxaa madax ka ah ergayga gaarka ah ee Qaramada Midoobay oo haatan ay Catriona Laing ku matalaysay.
Wakiillo ka horeeyay Catriona oo ay Qaramada Midoobey u igmatay xafiiskan ayaa loo jaray waxa loo yaqaan 'Persona non grata' oo ah in aaan ergaygaas dalka laga rabin halka kuwa kale cabashooyin laga gudbiyay kadibna QM ku qasbanaatay in ay qof kale ku baddesho.
Ilaa hadda waxaal la ogyagay in Catriona la beddelay ayadoo aan la gaarin dhamaadka muddo xileedkeeda oo ku eg 21 Maajo, balse Cumar oo aan weydiinay waxa keeni kara in si rasmi ah loogu dhawaaqo in Catriona ay shaqadeeda soo gabagabaynayso bisha soo socota ayaan meesha ka saarin in ay DFS ka dacwootay.
Si kastbaha ha ahaatee Catriona waxay kasoo dhex muuqatay xaalado siyaasadeed oo gudaha dalka ah intii ay xafiiska joogtay.
Sannadkii tagay ergeyga gaarka ah ee Qaramada Midoobay u qaabilsan Soomaaliya Catriona Laing ayaa ku boorisay in hoggaanka Puntland si deg deg ah dib ugu soo laabtaan golaha wadatashiga qaran, iyadoo uu weli taagan yahay khilaafka u dhaxeeya dowladda federaalka iyo maamul goboleedyada.
Waxay timid kadib markii hogaamiyaha maamul goboleedka waqooyi bari ee Soomaaliya (Puntaland) Siciid Cabdullaahi Deni uu diiday inuu ka qeyb galo shirka ay isugu imaanayaan madaxweynayaasha federaalka iyo kuwa maamul goboleedyada.
Bayaan ay dabayaaqadii bishii febraayo Catriona ka hor akhrisay Golaha amaanka ee Qaramada Midoobey ayey ku tiri:
“Soo jeedinta Golaha Wadatashiga Qaranka (NCC) ee 27 Maajo ee ku saabsan qaabka doorasho ee la soo jeediyay ayaa weli ah mid si adag looga doodayo. Dhinaca wanaagsan, waxaa jira taageero ballaaran oo dadweynuhu ay u hayaan u gudbida doorasho Hal Qof iyo Hal Cod ah (OPOV), laakiin waxaa sidoo kale jirta in la ogaaday in waqtiyada ay soo jeedisay NCC ay yihiin kuwo hammi oo kaliya ah.
Qaramada Midoobay waxay kala shaqaynaysaa Wasaaradda Arrimaha Gudaha ee Federaalka iyo Dib-u-heshiisiinta si loo sameeyo qorshe macquul ah kaas oo hubin doona in la joogteeyo dardargelinta OPOV”.
Ansixintii baarlamaanka ee wax ka baddalka cudubyo ka mid ah dastuurka oo uu ka mid yahay kan doorashada ayey ka boodday Puntland, hase yeeshee Catriona ayaa booqatay Garowe iyada oo kulan la yeelatay Madaxweynaha maamulka Puntland xilli uu jiro khilaafka kala dhexeeya DFS.
0 Comments